Universelt utforma tursti
Lars Gotaas
Kvardagsfriluftslivet har mykje å seie for den generelle folkehelsa. Merka turstiar, skiløyper, akebakkar, badeplassar, fiskeplassar, skogsområde og andre grøntareal i nærleiken av der folk bur, er viktige å ivareta og utvikle.
Støtte til enkelt og nært friluftsliv
Innlandet fylkeskommune arbeider derfor for at alle skal ha høve til naturopplevingar og friluftsliv i nærmiljøet sitt.
Sommaren 2025 vedtok fylkesutvalet støtteordninga «Friluftsliv – enkelt og nært i Innlandet», og løyvde 2,3 millionar kroner. Føremålet med ordninga er å fremje friluftslivet i nærmiljøet. Det er dette prosjektet som no har fått støtte frå dei to sparebankstiftingane. Dermed aukar potten til nærfriluftsliv i Innlandet med heile 20 millionar kroner.
– Fylkeskommunen skal bidra til å halde oppe allemannsretten, ivareta friluftsinteressene i regional og kommunal planlegging, bidra til å sikre og legge til rette friluftslivsområde og stimulere innbyggarane i fylket til helsefremjande og miljøvennleg friluftslivsaktivitet, seier leiar for hovudutval for kultur i Innlandet fylkeskommune, Tom Svellet (Ap).
Han seier vidare at dette prosjektet er midt i blinken for desse ambisjonane.
– Det er veldig positivt og viktig at samfunnsnyttige stiftingar og det offentlege samarbeider om denne typen prosjekt.
Tilgjengelege og attraktive nærmiljø
– Vi er glade for å kunne bidra til tilgjengelege og attraktive nærmiljø for å skape eit løft for friluftslivet. Det er positivt at fylkeskommunen har den koordinerande rolla for å utvikle opne og inkluderande møteplassar i kommunane, seier gåvesjef i Sparebankstiftelsen Hedmark, Kristin Vitsø Bjørnstad.
Leiar for natur og friluftsliv i Sparebankstiftelsen DNB, Sissel Karlsen, seier dei er stolte over å kunne bidra saman med Sparebankstiftelsen Hedmark.
– Vi er opptekne av at folk skal ha tilgang i til natur, turområde og møteplassar som er lett tilgjengelege, og der det er låg terskel for å vere i aktivitet. Vi ønsker Innlandet fylkeskommune lykke til med prosjektet, seier Karlsen.
Minst eitt større tiltak i kvar region
Det var prosjektleiinga i fylkeskommunen som søkte begge stiftingane for å kunne gjennomføre og tildele midlar til gode prosjekt.
– Begge gav full pott på ti millionar kroner kvar. Det er vi svært glade for, seier prosjektleiar i Innlandet fylkeskommune, Tuva Eiklid.
Ho seier vidare at tilskota bidreg til å skape stor meirverdi i prosjekt som kommunane sjølv meiner er viktig for å skape gode lokalsamfunn.
– Dette sikrar at fleire får tilgang til lågterskel friluftsliv med møteplassar som er universelt utforma. Utgangspunktet er minst eit større tiltak i kvar region.
Kommunar og friluftsråd kan søke
Kommunar og friluftsråd i Innlandet kan søke på ordninga. Det blir oppmoda til samarbeid med frivillige lag/foreiningar i planlegging og gjennomføring.
Første runde med søknader er allereie gjennomført. Det er nye søknadsfristar 15. mai og 15. september 2026. Prosjektperioden er ut 2027.
– Dette er eit pilotprosjekt som vi håpar kan vere til inspirasjon for ei større nasjonal satsing, avsluttar Eiklid.