Det polske kulturprogrammet "Increased participation in a diverse local arts and culture scene" har som mål å styrkje kulturdeltaking, mangfald og kunstnarleg fridom gjennom samarbeid mellom polske og internasjonale kulturaktørar.
For å søkje må den polske prosjekteigaren ha med minst éin partnar frå Noreg, Island eller Liechtenstein. Norske kulturaktørar kan dermed ta del i utvikling og gjennomføring av prosjekt innan kunst, kulturformidling, kompetanseutvikling, festivalar, residensar og internasjonalt samarbeid.
Innlandet har gode erfaringar
Fleire kulturaktørar i Innlandet har tidlegare fått støtte gjennom EØS-midlane til samarbeid med polske partnarar.
Amandusfestivaken bygde internasjonale filmnettverk.
Gjennom prosjektet "Polish-Norwegian Film Festivals Cooperation" samarbeidde Amandusfestivalen på Lillehammer med polske filmaktørar om å styrkje kontakten mellom unge filmskaparar i Noreg og Polen.
Prosjektet fekk om lag 100 000 euro i støtte, og utvikla samarbeid mellom Amandusfestivalen og den polske WAMA Film Festival. Målet var å skape møteplassar for unge filmskaparar, dele kompetanse og byggje varige nettverk på tvers av landegrensene.
Les om Polish-Norwegian Film Festivals Cooperation her
Kunstbanken skapte nye møte mellom kunstnarar og publikum
Kunstbanken senter for samtidskunst på Hamar deltok i prosjektet “Historier. Verden er mer komplisert enn våre sannheter om den” saman med Mazovian Museum i Polen.
Prosjektet fekk 437 000 euro i støtte og la til rette for utstillingar, performancekunst, workshops, kunstnarutveksling og formidlingsarbeid for barn og unge. Gjennom samarbeidet fekk ni kunsthandverkarar frå Innlandet vist arbeida sine i Polen, samtidig som polske kunstnarar og kunstuttrykk vart presenterte for publikum i Noreg.
Les om Historier her
Kven kan delta?
Norske kulturaktørar med organisasjonsnummer kan vere partnarar i prosjekta. Det gjeld mellom anna:
- kulturinstitusjonar
- kunstsenter og museum
- festivalar
- kulturorganisasjonar og stiftingar
- frivillige organisasjonar
- kulturbedrifter
Norske partnarar skal vere aktive samarbeidspartnarar og bidra med kunstnarleg eller fagleg kompetanse, prosjektutvikling, nettverksbygging og gjennomføring av aktivitetar.
Søk no
Her kan du søkje
Den første utlysinga er open no med søknadsfrist 10. november. Prosjektstøtta varierer frå 100 000 til 500 000 euro, og prosjekta kan vare i opptil tre år.
For kulturaktørar i Innlandet kan dette vere ei unik moglegheit til å utvikle internasjonale samarbeid, skape nye kunst- og kulturprosjekt og byggje langsiktige nettverk i Europa.